港女擺脫「地獄廚神」稱號第一式：整個好味火鍋湯底。
是日芒少上班，到夜晚差不多八點先臨時決定同佢喺屋企打邊爐，芒少話想食醉雞鍋/椰子雞鍋，但落到街市哩個鐘數梗係乜都收檔啦，我剩係買到棵菜同幾粒丸已經偷笑。
之後去咗超市撞下手氣，又俾我撞正今日九折超開心(師奶心態)，但買唔到椰子何來椰子雞湯底呢？本身諗住放棄點知立眼見到凍飲櫃有無添加椰子水(7仔都買到嗰支呢)，再搵到半隻雞，加屋企有盒雞湯，咁咪椰子雞湯囉！覺得自己咁都諗到好醒，然後自信滿滿咁買多包腸仔同肥牛就返歸準備，再摷下屋企有咩材料，就坐定定等芒少收工，打得成邊爐啦！
【甜到漏養生椰子雞湯底】食材如下：
雞 (半隻)、椰子水 (1L裝一支)、雞湯 (半盒)、甘荀 (一條)、椰子肉及杞子 (雪櫃摷到、隨意)
【詩勁教路邊爐．二人前材料】
豆腐 (一磚)、娃娃菜 (兩棵)、薯仔 (一個)、急凍蠔 (兩隻、屋企冰箱摷到)、腸仔 (兩條)、豚肉 (一碟)、肥牛 (一碟)、牛脊肉 (12塊)、烏冬 (一個)、日本果汁酒 (兩罐)、Coke Zero (一支 / $9.9咋不敢相信自己眼睛)。
以上份量不建議參考，因為太好味會不能自控地清哂，但飽到嘔...
#詩勁廚房 #其實冇乜好分享但少入廚嘅人覺自己好成功所以威下 #一個好湯底係成餐邊爐嘅靈魂 #下次挑戰醉雞湯底
Search